ئىسرائىلىيەنىڭ يىل ئوتتۇرىسىدا ئىرانغا ھۇجۇم قىلىش مۇمكىنلىكى ئىلگىرى سۈرۈلدى

ئامېرىكا ئىستىخبارات ئورگانلىرىنىڭ ئاشكارىلىشىچە، ئىسرائىلىيەنىڭ بۇ يىل ئوتتۇرىسىدا ئىرانغا ھۇجۇم قىلىش ئېھتىماللىقى بار ئىكەن.

كانادا يەر شارى پوچتا گېزىتىنىڭ 13-فېۋرال خەۋەر قىلىشىچە، ئامېرىكا ئىستىخبارات دوكلاتىدا ئاشكارىلىنىشىچە، ئىسرائىلىيە يىل ئوتتۇرىسىدىن بۇرۇن ئىراننىڭ يادرو ئەسلىھەلىرى ۋە مەركەزلىرىگە ئالدىن زەربە بېرىشى مۇمكىن بولۇپ، بۇ ئەھۋال رايوندىكى كەسكىنلىكنى تېخىمۇ كۈچەيتىپ، تېخىمۇ چوڭ توقۇنۇشلارنى كەلتۈرۈپ چىقىرىش خەۋپى بار ئىكەن.

دوكلاتتا كۆرسىتىلىشىچە، بۇنداق ھۇجۇم ئىراننىڭ يادرو پىروگراممىسىنى بىر نەچچە ھەپتە ياكى بىر نەچچە ئاي كېچىكتۈرەلەيدىكەن. ئاقساراي، ئىسرائىلىيە ھۆكۈمىتى مەركىزىي ئىستىخبارات ئىدارىسى ۋە باشقا ئىستىخبارات ئورگانلىرى بۇ دوكلات ھەققىدە ھېچقانداق ئىپادە بىلدۈرمىگەن.

مەلۇم بولۇشىچە، پىرېزىدېنت تىرامپ ھەربىي ھەرىكەت قوللىنىشتىن كۆرە، ئىران بىلەن سۆھبەت ئارقىلىق مەسىلىنى ھەل قىلىشنى خالايدىغانلىقىنى بىلدۈرگەن، لېكىن ئۇ ئىراننىڭ سۆھبەتكە قاتنىشىشنى كۈتۈپ تۇرمايدىغانلىقىنىمۇ تەكىتلىگەن. ئىستىخبارات مەلۇماتلىرىدا ئىسرائىلىيەنىڭ ئىراننىڭ فوردو ۋە ناتانز رايونلىرىنى نىشان قىلىشى مۇمكىنلىكى، ئامېرىكىنىڭ بولسا ھەرقانداق ھۇجۇمغا ھاۋادىن يېقىلغۇ تەمىنلەش ۋە ئىستىخبارات ياردىمى بېرىشى مۇمكىنلىكى كۆرسىتىلگەن.

تەييارلىغۇچى: ئابدۇخەبەر رەجەپ