مىسىر ئەرەب دۆلەتلىرىنىڭ تىرامپنىڭ غەززە پىلانىنى رەت قىلغانلىقىنى بىلدۈردى

مىسىر ھۆكۈمىتى ئامېرىكا تاشقى ئىشلار مىنىستىرى ماركو رۇبىيوغا ئەرەب دۆلەتلىرىنىڭ تىرامپنىڭ غەززە پىلانىنى رەت قىلغانلىقىنى بىلدۈرگەن.

ياپونىيە ئىقتىساد گېزىتى ئاسىيا بۆلۈمىنىڭ 11-فېۋرال خەۋەر قىلىشىچە، مىسىر تاشقى ئىشلار مىنىستىرى بەدىر ئابدۇللاھ ئامېرىكا تاشقى ئىشلار مىنىستىرى ماركو رۇبىيوغا ئەرەب دۆلەتلىرىنىڭ پىرېزىدېنت دونالد تىرامپنىڭ پەلەستىنلىكلەرنى غەززە رايونىدىن سۈرگۈن قىلىش توغرىسىدىكى پىلانىنى رەت قىلغانلىقىنى بىلدۈرگەن.

ۋاشىنگتوندا ئۆتكۈزۈلگەن يىغىندا بەدىر ئابدۇللاھ پەلەستىنلىكلەرنىڭ بۇ رايوندا قېلىش شەرتى ئاستىدا غەززەنى قايتا قۇرۇشنىڭ زۆرۈرلۈكىنى تەكىتلىگەن. ئامېرىكا تاشقى ئىشلار مىنىستىرلىقى غەززەنى باشقۇرۇشنىڭ ۋە بىخەتەرلىك جەھەتتىكى ھەمكارلىقنىڭ مۇھىملىقىنى تەكىتلىگەن.

ماركو رۇبىيو ھاماسنىڭ غەززەنى باشقۇرماسلىقى ياكى ئىسرائىلىيەگە تەھدىت پەيدا قىلماسلىقى كېرەكلىكىنى تەكىتلىگەن. بەدىر ئابدۇللاھ يەنە يېڭى ئامېرىكا ھۆكۈمىتى بىلەن رايوندا تىنچلىق ئورنىتىش ئۈچۈن ھەمكارلىشىش ئىستىكىنى بىلدۈرگەن.

بىلدۈرۈلۈشىچە، تىرامپنىڭ مىسىر ۋە ئىيوردانىيەنىڭ پەلەستىنلىكلەرنى قوبۇل قىلىشى توغرىسىدىكى تەكلىپى پەلەستىن رەھبەرلىكى ۋە قوشنا ئەرەب دۆلەتلىرىنىڭ قاتتىق قارشىلىقىغا ئۇچرىغان. تىرامپنىڭ پىلانى ئىرقىي تازىلاش ئەندىشىسىنى كەلتۈرۈپ چىقىرىدىغانلىقى بىلدۈرۈلمەكتە.

مەلۇم بولۇشىچە، 2023-يىلى 10-ئايدىن باشلانغان ئۇرۇش نەتىجىسىدە، ئىسرائىلىيەنىڭ ھەربىي ھەرىكىتى غەززە رايونىدىكى خەلقنىڭ ئېغىر تالاپەتكە ئۇچرىشى ۋە يۇرت-ماكانىدىن ئايرىلىپ قېلىشىغا سەۋەب بولغان.

تەييارلىغۇچى: ئابدۇخەبەر رەجەپ