تىرامپ ھاماسقا ئەڭ ئاخىرقى ئۇلتىماتوم تاپشۇردى

ئامېرىكا پىرېزىدېنتى دونالد تىرامپ پەلەستىن ئىسلامىي قارشىلىق كۆرسىتىش تەشكىلاتى ھاماسقا ئاخىرقى ئۇلتىماتوم تاپشۇرۇپ، ئەسىرلەرنى تولۇق قويۇپ بېرىشنى تەلەپ قىلغان.

ئامېرىكا پىرېزىدېنتى دونالد تىرامپ ھاماسقا ئاخىرقى ئۇلتىماتوم تاپشۇرۇپ: «ئەگەر مۇشۇ شەنبە چۈشتىن بۇرۇن غەززەدىكى بارلىق ئىسرائىلىيەلىك ئەسىرلەر قويۇپ بېرىلمىسە، غەززە دوزاخقا ئايلىنىدۇ» دېگەن.

مۇخبىرلار تىرامپتىن «دوزاخقا ئايلىنىدۇ» دېگەن ئىبارىنىڭ قانداق مەنىسىنى بارلىقىنى سورىغان بولۇپ، تىرامپ جاۋابىنىڭ بېشىدا: «سىلەر بىلىسىلەر. ھاماسمۇ مېنىڭ نېمە دېمەكچى بولغانلىقىمنى بىلىدۇ» دەپ جاۋاب بەرگەن. ئۇ ئارقىدىن يەنە ئۇرۇش توختىشىنى ئاخىرلاشتۇرۇشنى ئىسرائىلىيە قارار قىلىدىغانلىقىنى، ئەمما ئەگەر ئەسىرلەر ئۇنىڭ بەلگىلىگەن ۋاقتىدىن بۇرۇن قويۇپ بېرىلمىسە، كېلىشىمنى بىكار قىلىشنى مۇۋاپىق دەپ قارايدىغانلىقىنى بىلدۈرگەن.

تىرامپ دۈشەنبە كۈنى ئاقسارايدا ئىجرائىيە بۇيرۇقىغا ئىمزا قويۇش جەريانىدا ئەسىرلەر سۆھبىتى ھەققىدە پىكىر بايان قىلغان.

بىلدۈرۈلۈشىچە، ھاماس دۈشەنبە كۈنى شەنبە كۈنى ئىشقا ئاشۇرماقچى بولغان كېيىنكى قېتىملىق ئەسىرلەرنى قويۇپ بېرىش ۋاقتىنىڭ كېچىكتۈرۈلگەنلىكىنى بىلدۈرگەن. ھاماس باياناتچى ئىسرائىلىيەنىڭ ھاۋا ھۇجۇمى ئارقىلىق غەززەدىكى پەلەستىنلىكلەرنى نىشانغا ئالغانلىقى ۋە ئۇرۇش توختىتىش كېلىشىمىنى بۇزغانلىقىنى ئەيىبلىگەن.

ھاماسنىڭ قوراللىق قىسمى قەسسام بىرىگادىسىنىڭ باياناتچىسى ئەبۇ ئۇبەيدە: «ئىسرائىلىيەنىڭ كېلىشىمگە خىلاپلىق قىلىش ھەرىكىتى يەر-ماكانىدىن ئايرىلىپ قالغان پەلەستىنلىكلەرنىڭ غەززەنىڭ شىمالىغا قايتىشىغا يول قويۇشنىڭ كېچىكتۈرۈلۈشى، ئۇلارغا قارىتىلغان ھاۋا ھۇجۇمى ۋە ئوق چىقىرىش شۇنداقلا كېلىشىم بويىچە كىشىلىك ھوقۇق ياردىمىنىڭ غەززەگە كىرىشىنى چەكلەشنى ئۆز ئىچىگە ئالىدۇ» دېگەن.

ئىسرائىلىيە مۇداپىئە مىنىستىرى ئىسرائىل كاتز ھاماسنىڭ كېيىنكى قېتىملىق ئەسىرلەرنى قويۇپ بېرىش پىلانىنى كېچىكتۈرۈشىنىڭ ئۇرۇش توختىتىش كېلىشىمىگە پۈتۈنلەي خىلاپ ئىكەنلىكىنى بىلدۈرگەن. ئۇ يەنە ئىسرائىلىيە قوشۇنىغا ئەڭ يۇقىرى ھوشيارلىق ھالىتىنى ساقلاشنى بۇيرۇغان. باش

مەلۇم بولۇشىچە، ھاماس باياناتچىسى ئەبۇ ئۇبەيدە 15-فېۋرالدا ئىشقا ئاشۇرۇش پىلانلانغان ئەسىر ئالماشتۇرۇش ھەرىكىتىنىڭ ئىسرائىلىيە ئۆز مەجبۇرىيەتلىرىگە رىئايە قىلغۇچە كېچىكتۈرۈلىدىغانلىقىنى بىلدۈرگەن. ئۇ باياناتىنىڭ ئاخىردا يەنە ئىسرائىلىيە ئۇرۇش توختىتىش كېلىشىمىنىڭ ماددىلىرىغا رىئايە قىلسا، ئۆزلىرىنىڭمۇ شۇنداق قىلىدىغانلىقىنى تەكىتلىگەن.

تەييارلىغۇچى: ئابدۇخەبەر رەجەپ