خىتاي ياپونىيە باش ئەلچىسىگە نارازىلىق بىلدۈردى

خىتاي ياپونىيەنىڭ خىتايدا تۇرۇشلۇق باش ئەلچىسىنى مىنىستىرلىققا چاقىرتىپ نارازىلىق بىلدۈردى.

خىتاي تاشقى ئىشلار مىنىستىرلىقى ئورگان تورىنىڭ 10-فېۋرال خەۋەر قىلىشىچە، خىتاي تاشقى ئىشلار مىنىستىرلىقى ئاسىيا بۆلۈمىنىڭ باشلىقى ليۇ جىنسۇڭ ياپونىيەنىڭ خىتايدا تۇرۇشلۇق باش ئەلچىسى بىلەن كۆرۈشۈپ، يېقىندا ياپونىيە-ئامېرىكا رەھبەرلىرى سۆھبىتىدە ئېلان قىلىنغان ياپونىيە-ئامېرىكا قوشما باياناتىدىكى خىتايغا قارشى مەزمۇنلارغا قارىتا نارازىلىقىنى ئوتتۇرىغا قويغان.

خەۋەر قىلىنىشىچە، خىتاي تاشقى ئىشلار مىنىستىرلىقىنىڭ باياناتچىسى شۇ كۈنى باياناتىدا ئامېرىكا بىلەن ياپونىيەنىڭ خىتايغا مۇناسىۋەتلىك باياناتلىرىغا قاتتىق نارازى ئىكەنلىكىنى، ئىككى تەرەپنىڭ مەيدانىغا قەتئىي قارشى تۇرىدىغانلىقىنى دەۋا قىلغان.

ياپونىيە باش ۋەزىرى شىگېرۇ ئىشىبا ئۆتكەن ھەپتە ۋاشىنگتونغا زىيارەتكە بارغان بولۇپ، جۈمە كۈنى ئاقسارايدا پىرېزىدېنت دونالد تىرامپ بىلەن تۇنجى قېتىملىق يۇقىرى دەرىجىلىكلەر يىغىنى ئۆتكۈزگەنىدى. ئىككى تەرەپ يىغىندىن كېيىن ئېلان قىلغان بىرلەشمە باياناتتا، خىتاينىڭ شەرقىي دېڭىزدىكى ۋەزىيەتنى ئۆزگەرتىش ئۇرۇنۇشىغا قەتئىي قارشى تۇرىدىغانلىقىنى، شۇنداقلا خىتاينىڭ جەنۇبىي دېڭىزدىكى قانۇنسىز ئىگىلىك ھوقۇق تەلىپى، ھەربىيلەشتۈرۈش ھەرىكەتلىرى ۋە تەھدىت، قۇترىتىش پائالىيەتلىرىگە قارشى تۇرىدىغانلىقىنى بىلدۈرگەنىدى. ئىككى رەھبەر يەنە تەيۋەن بوغۇزىنىڭ تىنچلىقى ۋە مۇقىملىقىنى ساقلاشنىڭ مۇھىملىقىنى ھەمدە تەيۋەننىڭ خەلقئارالىق تەشكىلاتلارغا قاتنىشىشىنى قوللايدىغانلىقىنى تەكىتلىگەنىدى.

تەييارلىغۇچى: ئابدۇخەبەر رەجەپ