DeepSeek ھۆكۈمەت ئورگانلىرىدا چەكلىنىشكە باشلىدى

خىتاينىڭ سۈنئىي ئەقىل سۇپىسى DeepSeek نىڭ بىخەتەرلىك خەۋپى سەۋەبلىك، ئامېرىكىنىڭ نىيۇيورك ئىشتاتىدىكى ھۆكۈمەت ئۈسكۈنىلىرىدە مەزكۇر دېتالنى ئىشلىتىلىش رەسمىي چەكلەندى.

مىللىيەت گېزىتىنىڭ 11-فېۋرال خەۋەر قىلىشىچە، نىيۇيورك ئىشتات باشلىقى كەسى ھوكۇل بۇ ھەقتە ئېلان قىلغان باياناتىدا، ئىشتاتلىق ھۆكۈمەت خادىملىرىنىڭ DeepSeek دېتالىنى ھۆكۈمەت ئورگانلىرىغا تەۋە ئۈسكۈنىلەر ۋە سۇپىلارغا چۈشۈرۈشى چەكلەنگەنلىكىنى ئېلان قىلغان.

كەسى ھوكۇل باياناتىدا، DeepSeek تە ئىشلەتكۈچىنىڭ ئۇچۇرلىرىنى توپلاش ۋە تېخنىكىلىق سىرلارنى ئېرىشىۋېلىش خەۋپىنىڭ مەۋجۇت ئىكەنلىكىنى، ئاممىۋى بىخەتەرلىك ئۆزىنىڭ ئالدىنقى ۋەزىپىسى ئىكەنلىكىنى، نىيۇيورك ئاھالىلىرىنى ھەم چەت ئەللىك، ھەم يەرلىك تەھدىتلەردىن قوغداش ئۈچۈن داۋاملىق تىرىشىدىغانلىقىنى بىلدۈرگەن. 

مەلۇم بولۇشىچە، ئۆتكەن ھەپتە پالاتا ئەزالىرىدىن دېموكراتچى جوش گوتھېيمېر بىلەن جۇمھۇرىيەتچى دارىن لاھود DeepSeek نىڭ ھۆكۈمەتكە تەۋە ئۈسكۈنىلەردە ئىشلىتىلىشىنى چەكلەش ئۈچۈن قانۇن لايىھەسى سۇنغان.

خىتايدا خۇەنفاڭ كاپىتالىنىڭ قوللىشىغا ئېرىشكەن DeepSeek باشقا سۈنئىي ئەقىل شىركەتلىرىگە سېلىشتۇرغاندا تۆۋەن باھا ۋە ئاز ئۆزەك ئىشلىتىپ ياساپ چىققان ئوچۇق مەنبەلىك يېڭى مودېلى DeepSeek-R1 نى 20-يانۋار بازارغا سالغان ۋە قىسقا ۋاقىت ئىچىدە دۇنيا بويىچە كەڭ كۆلەمدە ئىشلىتىلىشكە باشلىغان. مەزكۇر سۈنئىي ئەقىل دېتالىChatGPT نى بېسىپ چۈشۈپ، ئەڭ كۆپ چۈشۈرۈلگەن سۈنئىي ئەقىل دېتالىغا ئايلانغان. ئەمما DeepSeek نىڭ ئىشلەتكۈچىنىڭ ئۇچۇرلىرىنى توپلاش ۋە تېخنىكىلىق سىرلارنى ئوغرىلاش مەشغۇلاتلىرى ئەندىشە قوزغىماقتا.

تەييارلىغۇچى: ئابدۇخەبەر رەجەپ