خىتاي شىركىتى DeepSeek غايەت زور شەخسىي ئۇچۇرلارنى توپلىغان

كورىيە ئىستىخبارات ئورگىنىنىڭ ئاشكارىلىشىچە، خىتاينىڭ سۈنئىي ئەقىل سۇپىسى DeepSeek ئىشلەتكۈچىلەرنىڭ ھەددىدىن زىيادە كۆپ شەخسىي ئۇچۇرلىرىنى توپلىغان.

نىككېي ئاسىيا تورىنىڭ 10-فېۋرال خەۋەر قىلىشىچە، كورىيە دۆلەت بىخەتەرلىك ئىدارىسى خىتاينىڭ سۈنئىي ئەقىل سۇپىسى DeepSeek نىڭ شەخسىي ئۇچۇرلارنى ھەددىدىن زىيادە توپلىشىدىن ئەندىشە قىلىۋاتقان بولۇپ، DeepSeek سۆھبەت خاتىرىلىرىنى يۆتكىشى، كىرگۈزۈلگەن ئۇچۇرلارنى توپلىشى بىخەتەرلىك خەۋپى كەلتۈرۈپ چىقىرىدىكەن.

كورىيە ھۆكۈمىتىنىڭ بەزى تارماقلىرى مەزكۇر سۈنئىي ئەقىل سۇپىسىنى ئىشلىتىشنى چەكلىگەن بولۇپ، ئاۋسترالىيە ۋە تەيۋەنمۇ ئوخشاش تەدبىر قوللانغان. كورىيە دۆلەت بىخەتەرلىك ئىدارىسى يەنە DeepSeek نىڭ ئىشلىتىلگەن تىلغا قاراپ سەزگۈر مەسىلىلەرگە پەرقلىق جاۋاب بېرىدىغانلىقىنى، سىياسىي سوئاللارنى تەكشۈرىدىغانلىقىنى ئەيىبلىگەن.

خىتاي تاشقى ئىشلار مىنىستىرلىقى ئەيىبلەشلەرنى ئىنكار قىلىپ، شەخسىي ئۇچۇرلارنىڭ مەخپىيەتلىكى ۋە بىخەتەرلىكىنىڭ مۇھىملىقىنى دەۋا قىلغان.

تەييارلىغۇچى: ئابدۇخەبەر رەجەپ