ھىندىستاندا ماۋزېدۇڭچىلار ئېتىپ ئۆلتۈرۈلدى

ھىندىستاننىڭ ئوتتۇرا قىسمىدا ئونلىغان ماۋزېدۇڭچى ئەسەبىي كۈچلەر ھىندىستان بىخەتەرلىك كۈچلىرى تەرىپىدىن ئۆلتۈرۈلگەن.

ئامېرىكا CNN قانىلىنىڭ خەۋەر قىلىشىچە، 9-فېۋرال ھىندىستاننىڭ چاتتىسگار ئۆلكىسىدە يۈز بەرگەن قاتتىق توقۇنۇشتا، كەم دېگەندە 31 ماۋزېدۇڭچى ئەسەبىي ئۆلتۈرۈلگەن، بۇ جەرياندا ئىككى ساقچى ئۆلگەن. بۇ ھادىسە بۇ يىل ھىندىستاندا يۈز بەرگەن ئەڭ ئېغىر توقۇنۇش بولۇپ قالغان.

ساقچىلار ۋە قوراللىق قىسىم ماۋزېدۇڭچى ئەسەبىيلەرنىڭ يىغىلغانلىقى ھەققىدىكى ئىستىخبارات ئۇچۇرىنى تاپشۇرۇۋالغاندىن كېيىن، ئورمانلىق رايونىدا ھەرىكەت قوزغىغان. بىخەتەرلىك كۈچلىرى بۇ رايوننى تەكشۈرگەندە ئۆزئارا توقۇنۇش يۈز بېرىپ، ئەسەبىيلەر ۋە قانۇن ئىجرا قىلغۇچىلارنىڭ ئارىسىدا ئۆلۈش ۋە يارىلىنىش ئەھۋال كۆرۈلگەن. قوراللىق تونۇشتا ئىككى ساقچىمۇ يارىلانغان. نۆۋەتتە ھەرىكەت داۋاملىشىۋاتقان بولۇپ، بىر قىسىم قورال-ياراغ ۋە ئوق-دورىلار قولغا چۈشۈرۈلگەن. بۇ ۋەقە بىر ئاي ئىلگىرى يۈز بەرگەن يەنە بىر چوڭ توقۇنۇشتىن كېيىن يۈز بەرگەن بولۇپ، ئالدىنقى قېتىمقى توقۇنۇشتا ماۋزېدۇڭچىلاردىن 16 سى  ئۆلتۈرۈلگەن.

مەلۇم بولۇشىچە، 1967-يىلىدىن باشلاپ، ماۋزېدۇڭچى ئەسەبىي ئېقىم مەركىزىي ۋە شىمالىي ھىندىستاندىكى نامرات يەرلىك جامائەتلەرنىڭ خىزمەت پۇرسىتى ۋە تەبىئىي بايلىق مەنبەلىرىگە بولغان تەلىپىدىن كېلىپ چىققان. ئۇلار ماۋزېدۇڭنىڭ قاتتىق قول قانخورلۇق سىياسىتىدىن ئىلھام ئالغان بولۇپ، ھۆكۈمەت ئارمىيەسى ۋە ئاساسىي قۇرۇلمىلارغا قارشى زوراۋانلىق ھەرىكەتلىرى ئۇزۇندىن بېرى داۋام قىلىپ كەلگەن.

تەييارلىغۇچى: ئابدۇخەبەر رەجەپ