تەشكىلاتلار بىرلىكى تايلاندتىكى ئۇيغۇرلار ھەققىدە جىددىي بايانات ئېلان قىلدى

خەلقئارا شەرقىي تۈركىستان تەشكىلاتلار بىرلىكى تايلاندتا تۇتۇپ تۇرۇلۇۋاتقان 48 ئۇيغۇرنىڭ خەتەرلىك ئەھۋالى ھەققىدە بايانات ئېلان قىلدى. باياناتتا مۇنۇلار بىلدۈرۈلدى:

«تايلاندتا 12 يىلدىن بېرى قايتۇرۇش مەركىزىدە تۇتۇپ تۇرۇلۇۋاتقان 48 ئۇيغۇر ئەركىنلىكىگە ئېرىشىپ تۈركىيەدىكى ئائىلىسى ۋە ئۇرۇق-تۇغقانلىرى بىلەن جەم بولۇشنى كۈتۈۋاتقىنىدا، خىتايغا قايتۇرۇلۇش خەۋپىگە دۇچ كەلدى.

تايلاند باش ئەلچىسى ۋە تايلاند مۇداپىئە مىنىستىرى «ئۇيغۇرلارنى خىتايغا قايتۇرمايمىز» دېگەن بولسىمۇ، تايلاند ھۆكۈمىتىنىڭ يېقىندا خىتايغا قىلىدىغان زىيارىتى سەۋەبىدىن، بۇ خەۋپ يەنىلا يوقالمىدى. ئۇيغۇرلارنىڭ ھەرۋاقىت خىتايغا قايتۇرۇلۇشى مۇمكىنلىكى ھەققىدىكى ئەندىشىلەر كۈچەيمەكتە.

خىتايغا قايتۇرۇلغان تەقدىردە، 48 ئۇيغۇرنىڭ ئېغىر ئىنسانىي ھوقۇق دەپسەندىچىلىكىگە ئۇچراپ، ھاياتىغا خەۋپ يېتىدىغانلىقى خەلقئارالىق ئىنسان ھەقلىرى تەشكىلاتلىرى تەرىپىدىن كۆپ قېتىم تىلغا ئېلىندى. خىتاينىڭ شەرقىي تۈركىستاندا ئۇيغۇرلارغا قاراتقان سىستېمىلىق باستۇرۇش ۋە ئىرقىي قىرغىنچىلىق سىياسىتىنى نەزەرگە ئالغاندا، بۇ قايتۇرۇش خەلقئارالىق قانۇنلارغا ۋە ئىنسانىي قىممەت قاراشلارغا زىتتۇر.

بۇ ھەقتە ئىسلام دۇنياسىنىڭ ۋە مەزلۇم خەلقلەرنىڭ ئۈمىدى بولغان پىرېزىدېنت رەجەپ تاييىب ئەردوغان ۋە تاشقى ئىشلار مىنىستىرى خاقان فىداندىن تايلاندتا تۇتقۇندا تۇرغان 48 ئۇيغۇرنىڭ تۈركىيەگە ئېلىپ كېلىنىپ، ئائىلىلىرى بىلەن جەم بولۇشى ئۈچۈن، جىددىي دىپلوماتىك ھەرىكەت باشلاشنى تەلەپ قىلىمىز.

تۈركىيە تارىختىن بېرى مەزلۇملارنىڭ يېنىدا تۇرغان ۋە ئىنسانىي ھوقۇق دەپسەندىچىلىكىگە قارشى ئاۋاز چىقىرىپ كەلگەن. بۇ ئەھۋالدا تايلاند ھۆكۈمىتىگە قارىتىلغان ئۈنۈملۈك تىرىشچانلىقلار ئارقىلىق 48 ئۇيغۇرنى قۇتقۇزۇش مۇمكىن.

بىز ئىسلام دۇنياسىنى، خەلقئارالىق ئىنسان ھەقلىرى تەشكىلاتلىرىنى ۋە ۋىجدانى ئويغاق بارلىق ئىنسانلارنى تايلاندتىكى ئۇيغۇر قېرىنداشلىرىمىز ئۈچۈن ھەرىكەت قىلىشقا ۋە ئاۋاز چىقىرىشقا چاقىرىمىز.»