تەشكىلاتلار بىرلىكى ھەيئىتىنىڭ ھىندىستان زىيارىتى داۋام قىلماقتا

ھىندىستان ئۇيغۇر جەمئىيىتىنىڭ رەئىسى ۋاسىم ئابدۇللاھ باشچىلىقىدىكى ھەيئەت خەلقئارا شەرقىي تۈركىستان تەشكىلاتلار بىرلىكىگە ۋاكالىتەن ھىندىستاندىكى زىيارەتلىرىنى داۋاملاشتۇرماقتا.

ھەيئەت 21-يانۋار ھىندىستاندىكى تىبەتلەرنىڭ مەركىزى بولغان دارامسالادا تىبەت مۇستەقىللىقى ئۈچۈن كۈرەش قىلىۋاتقان «تىبەت مۇستەقىللىقى ئوقۇغۇچىلار تەشكىلاتى»نى (Students For a Free Tibet) زىيارەت قىلغان. زىيارەت جەريانىدا تىبەت ۋە شەرقىي تۈركىستاننىڭ مۇستەقىللىقى ئۈچۈن رايوندا داۋام قىلىۋاتقان خىزمەتلەردە ھەمكارلىشىش ۋە كۈچ بىرلىكى ھاسىل قىلىش توغرىسىدا بىرلىك ھاسىل قىلىنغان.

ھەيئەت 21-يانۋار يەنە مەركىزىي تىبەت ھۆكۈمىتى ئىشخانىسىدا نورزىن دولما خانىم بىلەن كۆرۈشكەن بولۇپ، سۆھبەت جەريانىدا ئىككى تەرەپ خىزمەتلىرىنى ئۆزئارا تونۇشتۇرغان. ھەيئەت نۆۋەتتە ئۇيغۇر خەلقى دۇچ كېلىۋاتقان ئىرقىي قىرغىنچىلىقنى تەكىتلەش بىلەن بىرگە، شەرقىي تۈركىستان مەسىلىسىنى تونۇشتۇرغان.

بۇ جەرياندا ھەيئەت نورزىن دولما خانىمنى دېھلىدا ئۆتكۈزۈلمەكچى بولغان يىغىندا شەرقىي تۈركىستان ھەققىدە دوكلات بېرىشكە تەكلىپ قىلغان. ئېچىلماقچى بولغان يىغىندا شەرقىي تۈركىستاننىڭ نۆۋەتتىكى ۋەزىيىتى ھەققىدە تېخىمۇ كۆپ مۇزاكىرە ئۆتكۈزۈلۈش ئارقىلىق، خەلقئارالىق جەمئىيەتنىڭ قوللىشىنى قولغا كەلتۈرۈش كۈتۈلمەكتىكەن.

ھەيئەت 22-يانۋار يەنە دارامسالادىكى تىبەت ئورگانلىرى ۋە تەشكىلاتلىرىنى، جۈملىدىن مەركىزىي تىبەت ئاياللار تەشكىلاتىنى زىيارەت قىلغان. بۇ جەرياندا تىبەت ۋە شەرقىي تۈركىستاندا داۋاملىشىۋاتقان ئىرقىي قىرغىنچىلىق مەسىلىسى ۋە تەشكىلاتلار ئارا ھەمكارلىق ھەم بىرلىكتە ھەرىكەت قىلىش مەسىلىسى مۇزاكىرە قىلىنغان.

تەييارلىغۇچى: ئابدۇخەبەر رەجەپ