خىتاي باياناتچىسى: ئەتراپتىكى تېررورلۇق كۈچلىرى قايتا سىڭىپ كىرىشكە ئۇرۇنۇۋاتىدۇ

ئاتالمىش «ئۇيغۇر ئاپتونوم رايونلۇق ھۆكۈمەت»نىڭ ئاخبارات باياناتچىسى شۈ گۈيشياڭ سۇمۇرغ تورىنىڭ مەخسۇس زىيارىتىنى قوبۇل قىلىپ، ئاتالمىش «تېررورلۇققا ۋە ئەسەبىيلىككە قارشى تۇرۇش»نى داۋاملىق چىڭ تۇتىدىغانلىقى ھەققىدە جار سالدى.

خىتاينىڭ سۇمۇرغ تورىنىڭ خەۋەر قىلىشىچە، خىتاي مۇخبىرى ئوتتۇرا شەرق ۋەزىيىتىنى شەرقىي تۈركىستان ۋەزىيىتىگە باغلىغان ھالدا: «ئوتتۇرا شەرق ۋەزىيىتى داۋالغۇپ تۇرغان بىر ۋەزىيەتتە، شىنجاڭنىڭ نۆۋەتتىكى مۇقىم ھالىتىنى داۋاملىق ساقلاپ قالغىلى بولامدۇ؟» دەپ سورىغان. شۈ گۈيشياڭ بۇنىڭغا جاۋاب بېرىپ، شەرقىي تۈركىستاندا 2016-يىلىدىن بۇيان ھېچقانداق تېررورلۇق ۋەقەسى يۈز بەرمىگەنلىكىنى، ئەمما بۇنىڭلىق بىلەن «ئۇخلاپ قېلىش»قا بولمايدىغانلىقىنى، ئەتراپتىكى تېررورلۇق كۈچلىرىنىڭ ئاكتىپ ھالەتتە تۇرۇۋاتقانلىقىنى، ئۇلارنىڭ تۈرلۈك ئاماللار بىلەن قايتا سىڭىپ كىرىشكە ۋە شەرقىي تۈركىستاندا قايتا ئاپەت تۇغدۇرۇشقا ئۇرۇنۇۋاتقانلىقىنى، بۇ سەۋەبلىك تېررورلۇقتىن مۇداپىئەلىنىش ۋە زەربە بېرىشنىڭ ئىنتايىن مۇھىم ئىكەنلىكىنى دەۋا قىلغان.

مۇخبىر ئۇنىڭدىن يەنە شەرقىي تۈركىستاندىكى يۇقىرى بېسىملىق سىياسەت سەۋەبلىك، خەلقنىڭ بىر قىسىم ئەركىنلىكى قۇربان قىلىنغانلىقى ھەققىدىكى سۆزلەرگە قانداق قارايدىغانلىقىنى سورىغان. شۈ گۈيشياڭ شەرقىي تۈركىستاندا ئىلگىرى خەلقنىڭ ۋەھىمە ئىچىدە ياشايدىغانلىقىنى، ئەركىنلىكتىن سۆز ئاچقىلى بولمايدىغانلىقىنى، تۈرلۈك تەدبىرلەردىن كېيىن ھازىرقىدەك مۇقىم ۋەزىيەت بارلىققا كەلگەنلىكىنى ئېيتىپ بىلجىرلىغان.

ئالدىنقى كۈنلەردە  تۈركىستان ئىسلام پارتىيەسىنىڭ كېيىنكى قەدەمدە خىتايغا قارشى ئاتلىنىدىغانلىقى ھەققىدىكى بايانلىرى خەلقئارا كۈچلۈك غۇلغۇلا قوزغىغاندىن كېيىنلا خىتاي باياناتچىنىڭ ئاتالمىش «تېررورلۇققا قارشى تۇرۇش»نى قايتا تەكىتلىشى ۋە ئوتتۇرا شەرق ۋەزىيىتى بىلەن شەرقىي تۈركىستان ۋەزىيىتىنى بىر-بىرىگە باغلىشى دىققەت قوزغىماقتا.