ئۆلىمالار بىرلىكىدىن بىر ھەيئەت قەيسەرىدە زىيارەتتە بولدى

شەرقىي تۈركىستان ئۆلىمالار بىرلىكىنىڭ رەئىسى دوكتور ئالىمجان بۇغدا باشچىلىقىدىكى بىر ھەيئەت 23-ئۆكتەبىر تۈركىيەنىڭ قەيسەرى شەھىرىدە زىيارەتتە بولدى.

ھەيئەت زىيارەت جەريانىدا قەيسەرىدە ياشاۋاتقان بىر قىسىم ئۇيغۇرلار بىلەن ئۇچرىشىپ ئەھۋاللاشتى ۋە «قەيسەرى ئۇيغۇر مەكتىپى»نى زىيارەت قىلىپ، ئۇيغۇر ئۆسمۈرلەر بىلەن سۆھبەتلەشتى ھەمدە شەرقىي تۈركىستان ئۆلىمالار بىرلىكى تەتقىقات بۆلۈمىنىڭ مۇدىرى مۇھەممەد يۈسۈپ قارىھاجىم يازغان «ئىسلام ئەخلاقى» ناملىق ئەسەرنى ئوقۇغۇچىلارغا تارقىتىپ بەردى.

ھەيئەت يەنە قەيسەرىدىكى پىدائىي مەدەنىيەت تەشكىلاتىنى زىيارەت قىلغان بولۇپ، تەشكىلاتنىڭ باشلىقى ئەھمەد تاش ئەپەندى ھەيئەتنى ئىشخانىسىدا كۈتۈۋالدى. بۇ جەرياندا دوكتور ئالىمجان بۇغدا تۈركىيە ۋە دۇنيانىڭ ھەرقايسى جايلىرىدا ياشايدىغان شەرقىي تۈركىستانلىق ئۇيغۇر مۇھاجىرلىرى، ئۇلارنىڭ ئۆزئارا ئالاقىسى، تۇرمۇش شارائىتى ۋە ئۈمىدلىرىنى، شۇنداقلا شەرقىي تۈركىستاننىڭ نۆۋەتتىكى ۋەزىيىتىنى تونۇشتۇردى.

تەييارلىغۇچى: ئابدۇخەبەر رەجەپ