خىتاي جىنايەتلىرىنى يوشۇرۇش ئۈچۈن شەرقىي تۈركىستاندا خەلق ئىچى سەنئىتى پائالىيىتى ئورۇنلاشتۇردى

خىتاي شەرقىي تۈركىستاندىكى جىنايەتلىرىنى يوشۇرۇش ئۈچۈن، ساختا تەشۋىقاتلىرىنى داۋاملىق كۈچەيتىۋاتقان بولۇپ، بۇ ئاينىڭ ئاخىرىغا شەرقىي تۈركىستاندا تۇنجى نۆۋەتلىك «خەلق ئىچى سەنئىتى پەسلى» ئورۇنلاشتۇرغان.

ئاتالمىش «شىنجاڭ گېزىتى»نىڭ خەۋەر قىلىشىچە، 9-ئاۋغۇست بېيجىڭدا بۇ توغرۇلۇق مەخسۇس ئاخبارات ئېلان قىلىش يىغىنى ئېچىلغان بولۇپ، خىتاي مەدەنىيەت ۋە ساياھەت مىنىستىرلىقى، ئاتالمىش «ئۇيغۇر ئاپتونوم رايونلۇق ھۆكۈمەت» ۋە شەرقىي تۈركىستاندىكى خىتاي ئىشلەپچىقىرىش-قۇرۇلۇش دىۋىزىيەسىنىڭ مەزكۇر تۈرگە بىرلىكتە مەسئۇل بولىدىغانلىقى قەيت قىلىنغان.

بىلدۈرۈلۈشىچە، تۇنجى نۆۋەتلىك «خەلق ئىچى سەنئىتى پەسلى»نىڭ باشلىنىش مۇراسىمى 20-ئاۋغۇست ئۈرۈمچىدە ئۆتكۈزۈلىدىكەن. باشلىنىش پائالىيىتىدە خىتاينىڭ ھەرقايسى ئۆلكىلىرىدىكى خەلق ئىچى سەنئەت نومۇرلىرى، مەدەنىيەت ۋە ساياھەت مىنىستىرلىقىغا بىۋاسىتە قاراشلىق ئەدەبىيات-سەنئەت ئۆمەكلىرىنىڭ سەھنە تىياتىرلىرى كۆرسىتىلىدىغان بولۇپ، كۆرگەزمە، يېمەك-ئىچمەك بازىرى قاتارلىق تۈرلەرمۇ ئورۇنلاشتۇرۇلىدىكەن.

مەزكۇر پائالىيەتكە ئاتالمىش «ئانار گۈللىرى ئېچىلىپ، ئورتاق ئارزۇ ئىشقا ئاشۇرۇلدى، شادلىققا چۆمگەن تۇپراق جۇڭخۇانى نۇرلاندۇردى» دېگەن تەشۋىقات شوئارلىرىنىڭ باش تېما قىلىنىشى ۋە «داپ چېلىپ ناخشا ئېيتايلى» دەپ ئومۇمىي نام بېرىلىشى بۇنىڭ پەقەت خىتاينىڭ يەنە بىر قېتىملىق ساختا تەشۋىقات پائالىيىتى ئىكەنلىكىنى كۆرسىتىپ بەرمەكتە.

خىتاي يىللاردىن بېرى شەرقىي تۈركىستاندا ئۇيغۇر قاتارلىق تۈركىي خەلقلەرنىڭ مەدەنىيىتىنى، ئەنئەنىۋى ئۆرپ-ئادەتلىرىنى، بايراملىرىنى كۆزدىن يوقىتىشقا، خىتاي مەدەنىيىتىنى زورلاپ تېڭىشقا ئۇرۇنۇپ كەلدى. بۇ قېتىملىق پائالىيەتمۇ خىتاينىڭ شەرقىي تۈركىستاندىكى ئىرقىي قىرغىنچىلىق جىنايىتىنى پەردازلاش، خىتاي ئاققۇنلىرىنى تېخىمۇ كۆپلەپ جەلپ قىلىش ھەرىكەتلىرىدىن بىرى ھېسابلىنىدۇ.