سابىق جاسۇس خىتاينىڭ مەخپىي ساقچى ھەرىكىتىنى ئاشكارىلىدى

خىتاينىڭ بىر سابىق جاسۇسى خىتاي رېجىمىنىڭ چەت ئەلدە ياشاۋاتقان ئۆكتىچىلەرنى نىشان قىلغان مەخپىي ساقچى ھەرىكىتىنى ئاشكارىلىدى.

ئاۋسترالىيە ABC خەۋەر قانىلىنىڭ 12-ماي خەۋەر قىلىشىچە، خىتاينىڭ سابىق ئالاھىدە خادىمى «تۆت بۇلۇڭ» ناملىق بىر تەكشۈرۈشتە خىتاينىڭ سېسىق نامى پۇر كەتكەن مەخپىي ساقچى ئورگىنىنىڭ ئىچكى ھەرىكىتى ۋە ئۇلارنىڭ چەت ئەلدىكى ئۆكتىچىلەرنى «ئوۋلاش» ھەرىكىتىنى ئاشكارىلىغان بولۇپ، ئاۋسترالىيە قاتارلىق دۆلەتلەردىكى ئېغىر بىخەتەرلىك مەسىلىسى دىققەت قوزغىغان.

بىلدۈرۈلۈشىچە، بۇ خىتاي ئىستىخبارات ئورگانلىرىنىڭ ئەڭ قورقۇنچلۇق ۋە كۈچلۈك بولغان مەخپىي تارمىقىدىكى بىر خادىمنىڭ تۇنجى قېتىم ئاشكارا ئاۋاز چىقىرىشى ھېسابلىنىدىكەن. تەكشۈرۈشتە يەنە مەزكۇر مەخپىي ساقچى تارمىقىنىڭ بۇلتۇر ئاۋسترالىيە تەۋەلىكىدە مەخپىي جاسۇسلۇق ھەرىكىتى ئىجرا قىلغانلىقى ۋە بىر ئاۋسترالىيە پۇقراسىنى 2019-يىلى مەخپىي ھالدا خىتايغا قايتۇرۇپ كەتكەنلىكى بايقالغان.

ئېرىك ئىسىملىك ​مەزكۇر خىتاي جاسۇس 2008-يىلىدىن 2023-يىلىنىڭ بېشىغىچە خىتاي رېجىمىنىڭ ساقچى ۋە بىخەتەرلىك ئورگىنى بولغان جامائەت خەۋپسىزلىك مىنىستىرلىقىنىڭ بۆلۈمىدە مەخپىي ئالاھىدە خادىم ۋەزىپىسىنى ئۆتىگەن. بۇ بۆلۈم خىتاي رېجىمىنىڭ ئاساسلىق باستۇرۇش ۋاسىتىلىرىنىڭ بىرى بولۇپ، دۇنيانىڭ ھەرقايسى جايلىرىدا ھەرىكەت قىلىپ، خىتاي كوممۇنىست رېجىمىنى تەنقىد قىلغۇچىلارنى، بولۇپمۇ شى جىنپىڭنى تەنقىد قىلغۇچىلارغا نازارەت قىلىش، تۇتقۇن قىلىش، ئاۋازىنى بېسىقتۇرۇش قاتارلىق ۋاسىتىلەرنى قوللىنىپ كەلگەن.

38 ياشلىق مەزكۇر خىتاي بىخەتەرلىك ئەندىشىسى سەۋەبىدىن خىتايدىن قاچقان بولۇپ، بۇلتۇر ئاۋسترالىيەگە كەلگەن ۋە ئۆزىنىڭ ئۆتمۈشىنى ئاۋسترالىيەنىڭ جاسۇسلۇق ئورگىنى ئاۋسترالىيە بىخەتەرلىك ئىستىخبارات تەشكىلاتىغا ئاشكارىلىغان. بىلدۈرۈلۈشىچە، ئۇنىڭ ۋەزىپىسى ۋە نىشانى خىتاي، ھىندىستان، كامبودژا، تايلاند، كانادا ۋە ئاۋسترالىيەگە چېتىشلىق ئىكەن.

تەييارلىغۇچى: ئابدۇخەبەر رەجەپ