ئىتالىيە پۇل يۇيۇش قارا گۇرۇھىنىڭ ئارقىسىدا خىتاينىڭ قولى بارلىقىنى ئاشكارىلىدى

ئىتالىيە ساقچىلىرى بۇ چارشەنبە 33 كىشىنى قولغا ئالغان بولۇپ، بۇلارنىڭ ئىچىدە «Ndrangheta» قارا گۇرۇھى ۋە باشقا زەھەرلىك چېكىملىك ​​ئەتكەسچىلىكى قارا گۇرۇھىغا  50 مىليون ياۋرودىن ئارتۇق پۇل يۇيۇپ بەرگەن خىتاي پۇقرالىرىمۇ بار ئىكەن.

ئامېرىكا ئاۋازىنىڭ 5-ئۆكتەبىردىكى خەۋىرىدە بىلدۈرۈلۈشىچە، ئىتالىيە مالىيە مۇھاپىزەت ساقچى ئەترىتى رويتىرس ئاگېنتلىقىغا خىتاي پۇل يۇيۇش ۋاسىتىچىلىرىغا زەربە بېرىش جەريانىدا،  «Ndrangheta» نىڭ پۇل يۇيۇش مۇلازىمىتى بىلەن تەمىنلەيدىغان خىتاي ئورۇنلىرى ئوتتۇرىسىدا باغلىنىش بارلىقىنى بايقىغانلىقىنى ئاشكارىلىغان. بىلدۈرۈلۈشىچە، پۇل-مۇئامىلە پائالىيىتىنى ئىز قوغلاپ تەكشۈرۈپ ئېنىقلانغان 50 مىليون ياۋرو بۇ ھەرىكەتنىڭ ھەقىقىي كۆلىمىنى ئەكس ئەتتۈرمەيدىكەن.

ساقچى ئەمەلدارى بۇ ھەقتە: «بۇ بىز 2020-يىلدىن 2022-يىلغىچە ئىز قوغلاپ تەكشۈرگەن دېلو، ئەمما تەكشۈرۈش بارلىق ھەرىكەتلەرنىڭ ئىزىنى قوغلاپ تەكشۈرەلمەيدۇ. يۈز بەرگەن ئىشلارنىڭ پەقەت %20 نىلا كۆرەلەيسىز» دېگەن.

ئىتالىيە مالىيە مۇھاپىزەت ئەترىتىنىڭ ساقچىلىرى باياناتىدا، ئۆزلىرىنىڭ يەتتە خىتاي پۇقراسىنى ئۆز ئىچىگە ئالغان 33 كىشىنى قولغا ئالغانلىقىنى، ئۇلارنىڭ رىم ۋە ئىتالىيەنىڭ باشقا ئالتە بازىرىدا زەھەرلىك چېكىملىك ​​ئەتكەسچىلىكى ۋە پۇل يۇيۇش جىنايىتىنى تەشكىللىك ھالدا قىلغانلىقى ئېنىقلانغانلىقىنى بىلدۈرگەن. باياناتتا: «ئۇلار يەنە چەت ئەلگە مەبلەغ يۆتكەشكە مەسئۇل ئاتالمىش ​​پۇل مۇئامىلە خادىملىرىدىن تەخمىنەن 10 مىليون ياۋرو نەق پۇلنى قولغا چۈشۈردۇق» دېگەن.

ساقچىلارنىڭ ئېيتىشىچە، بۇ خىل سودىدا خېرىدارلارنىڭ پۇلىنى نەق يۆتكەشكە بولمايدىكەن. خېرىدار پەقەت تەمىنلىگۈچى ساتقان دورىلارنىلا سېتىۋالىدىكەن، ئەمما خىتاي بۇ پۇلنىڭ ئاخىرقى بارىدىغان ئورنى ئىكەن.

تەييارلىغۇچى: ئابدۇخەبەر رەجەپ