خىتاي ناتونىڭ ئاسىيا-تىنچ ئوكيان رايونىغا كېڭىيىشىگە قارشى تۇرىدىغانلىقىنى بىلدۈردى

شىمالىي ئاتلانتىك ئەھدى تەشكىلاتى خىتاينى تەشكىلات مەنپەئەتى ۋە بىخەتەرلىكىگە خىرىس قىلغانلىقى ھەققىدىكى ئەيىبلىگەندىن كېيىن، خىتاي  بۇنىڭغا نارازىلىق بىلدۈردى ۋە شىمالىي ئاتلانتىك ئەھدى تەشكىلاتىنىڭ ئاسىيا-تىنچ ئوكيان رايونىغا كېڭەيتىشىگە قارشى تۇرىدىغانلىقىنى بىلدۈردى.

ئامېرىكا ئاۋازىنىڭ خەۋىرىدە بىلدۈرۈلۈشىچە، 11-ئىيۇل خىتاينىڭ ياۋروپا ئىتتىپاقىدىكى باياناتچىسى بايانات ئېلان قىلىپ: «شىمالىي ئاتلانتىك ئەھدى تەشكىلاتى باشلىقلار يىغىنىدا ئېلان قىلىنغان بىرلەشمە بايانات سوغۇق مۇناسىۋەتلەر ئۇرۇشى پىسخىكىسى ۋە ئىدىيەۋى قاراشلار بىلەن تولغان. خىتاي بۇنىڭغا قەتئىي قارشى تۇرىدۇ ۋە رەت قىلىدۇ» دېگەن.

خىتاي باياناتچىسى يەنە شىمالىي ئاتلانتىك ئەھدى تەشكىلاتىنىڭ رايونلۇق ھەربىي تەشكىلات بولۇش سۈپىتى بىلەن، تاشقى ئىشلارغا ئۈزلۈكسىز ئارىلىشىپ قارشىلىشىش پەيدا قىلىۋاتقانلىقىنى، تەشكىلاتنىڭ كېڭىيىش ئارزۇسى ۋە زومىگەرلىك پىلانىنىڭ ئېنىق ئاشكارىلانغانلىقىنى، ئۆزىنىڭ ئىگىلىك ھوقۇقى، بىخەتەرلىكى ۋە تەرەققىيات مەنپەئەتىنى قوغداپ، شىمالىي ئاتلانتىك ئەھدى تەشكىلاتىنىڭ شەرق ۋە ئاسىيا تىنچ ئوكيانغا كېڭىيىشىگە قەتئىي قارشى تۇرىدىغانلىقىنى بىلدۈرگەن.

شىمالىي ئاتلانتىك ئەھدى تەشكىلاتى سەيشەنبە كۈنى لىتۋانىيەنىڭ ۋىلنيۇس شەھىرىدە ئۆتكۈزۈلگەن ئىككى كۈنلۈك باشلىقلار يىغىنىدا قاتتىق سۆزلەر بىلەن بايانات ئېلان قىلىپ، خىتاينىڭ يامان غەرەزلىك ھەرىكىتى ۋە ساختا تور ئۇچۇرلىرى، ئىتتىپاقداشلارنى نىشان قىلغان دۈشمەنلىك سۆزلىرى، ئىتتىپاقداشلارنىڭ بىخەتەرلىكىگە بۇزغۇنچىلىق قىلغانلىقىنى، خىتاينىڭ قارا نىيىتى ۋە مەجبۇرلاش ۋاسىتىلىرى ئارقىلىق شىمالىي ئاتلانتىك ئەھدى تەشكىلاتىنىڭ مەنپەئەتى، بىخەتەرلىكى ۋە قىممەت قارىشىغا خىرىس قىلغانلىقىنى تىلغا ئالغان.

شىمالىي ئاتلانتىك ئەھدى تەشكىلاتىنىڭ باش كاتىپى يېنس ستولتېنبېرگ باشلىقلار يىغىنىدا قىلغان سۆزىدە: «گەرچە خىتاي شىمالىي ئاتلانتىك ئەھدى تەشكىلاتىنىڭ بىۋاسىتە دۈشمىنى بولمىسىمۇ، ئەمما خىتاي مەجبۇرلاش ھەرىكىتىنى كۈچەيتىش ئارقىلىق قائىدىگە تايانغان خەلقئارا تەرتىپكە خىرىس قىلماقتا. شۇنداقلا خىتاي رۇسىيەنىڭ ئۇكرائىناغا قىلغان تاجاۋۇزچىلىق ئۇرۇشىنى ئەيىبلەشنى رەت قىلدى. تەيۋەنگە تەھدىت سالدى ۋە ئارمىيەنى كەڭ كۆلەملىك كېڭەيتىشكە باشلىدى» دېگەنىدى.

تەييارلىغۇچى: ئابدۇخەبەر رەجەپ