بۇ يىل شەرقىي تۈركىستاندىن 100 مىليارد كىلوۋات توك خىتايغا توشۇلغان

ئاتالمىش "شىنجاڭ گېزىتى" خەۋىرىدە بىلدۈرۈلۈشىچە، خىتاي بۇ يىل شەرقىي تۈركىستاندىن 100 مىليارد كىلوۋات سائەتلىك توكنى خىتايغا توشۇپ كەتكەن.

ئاتالمىش شىنجاڭ ئېلېكتىر ئېنېرگىيە چەكلىك شىركىتىنىڭ ئاشكارىلىشىچە، بۇ يىل 23 – دېكابىرغىچە شەرقىي تۈركىستاننىڭ توك مەنبەسىنى توشۇش مىقدارى 100 مىليارد 12 مىليون كىلوۋات سائەتكە يەتكەن بولۇپ، بۇلتۇرقى ئوخشاش مەزگىلدىكىدىن ％40 ئاشقان. بۇ خىتاي تاجاۋۇزچىلىرىنىڭ شەرقىي تۈركىستاننىڭ توكىنى خىتاي ئۆلكىلىرىگە توشۇشنى باشلىغاندىن بۇيان، شەرقىي تۈركىستاننىڭ توك مەنبەسىنى يىللىق بۇلاڭ- تالاڭ قىلىپ، خىتايغا توشۇش مىقدارى تۇنجى قېتىم 100 مىليارد كىلوۋات سائەتتىن ئاشقان.

ئىگىلىنىشىچە، خىتاي تاجاۋۇزچىلىرى 2010- يىلىدىن باشلاپ شەرقىي تۈركىستاننىڭ توك ئېنېرگىيەسىنى خىتايغا توشۇشقا باشلىغان بولۇپ، 10 يىلىدىن بىرى 92 مىليون 80 مىڭ كىلوۋاتقا يەتكەن. بۇ يىل 7 – ئايدىن باشلاپ يەنە، شەرقىي تۈركىستاننىڭ شەرقىي جۇڭغاردىن ئەنخۇيغا 1100± كىلوۋولتلۇق ئالاھىدە يۇقىرى بېسىملىق تۇراقلىق توك توشۇش قۇرۇلۇشىنىڭ توك يەتكۈزۈش كۈچى 6 مىليون كىلوۋولتتىن 8 مىليون كىلوۋاتقا يەتكەن. بۇ قۇرۇلۇشتا بۇ يىل خىتايغا توشۇپ كېتىلگەن توك مىقدارى 43 مىليارد كىلوۋات سائەتكە يېتىپ، شەرقىي تۈركىستاننىڭ توكىنى خىتايغا توشۇش كۆلىمىنىڭ ％40 نى ئىگىلىگەن.

مەلۇم بولۇشىچە، خىتاي تاجاۋۇزچىلىرى نۆۋەتتە، شەرقىي تۈركىستاننىڭ ئېلېكتىر ئېنېرگىيەسىنى كەڭ – كۆلەملىك بۇلاڭ -تالاڭ قىلىپ، خىتاينىڭ 20 ئۆلكىسىگە توشۇماقتا ئىكەن.