خىتاي چەتئەل تېخنىكىسىغا بېقىنىپ قېلىشتىن قۇتۇلۇش ئۈچۈن يېڭى تەدبىر قوللاندى

 

مالىيە ۋاقىت گېزىتىنىڭ خەۋىرىدە بىلدۈرۈلۈشىچە، خىتاي دائىرىلىرى ئۈچ يىل ئىچىدە ئىدارە-ئورگانلاردىن چەتئەلدە ئىشلەنگەن كومپيۇتېر ۋە يۇمشاق دېتاللارنى تازىلاپ چىقىشنى پىلانلىغان.
خىتاي دائىرىلىرى يېقىندا ھەرقايسى ئىدارە-ئورگانلار ۋە ئاممىۋى مۇئەسسەسەلەرگە يوليورۇق چۈشۈرۈپ، كېلەر يىلى ئىچىدە چەتئەل كومپيۇتېرلىرى ۋە يۇمشاق دېتاللىرىنىڭ %30نى خىتايدا ئىشلەنگەن كومپيۇتېر ۋە يۇمشاق دېتاللارغا ئالماشتۇرۇشنى، 2021-يىلى %50نى ۋە 2022-يىلى قالغان %20نى ئالماشتۇرۇپ بولۇشى كېرەكلىكىنى بىلدۈرگەن.
خىتاينىڭ بۇ قارارى بىر تەرەپتىن ئامېرىكىنىڭ تۈرلۈك چەكلەش تەدبىرلىرىگە قايتۇرغان ئىنكاسى بولۇپ، يەنە بىر تەرەپتىن كۆپلىگەن دۆلەتلەردە قارشىلىققا ئۇچراۋاتقان مەھسۇلاتلىرىنى قوللىغانلىقى بولۇپ ھېسابلىنىدىكەن.
ئامېرىكا-خىتاي سودا ئۇرۇشى جەريانىدا خىتاينىڭ ئەڭ مۇھىم شىركىتىدىن بىر بولغان خۇاۋېي شىركىتى ھەم قاتتىق دېتال جەھەتتىن، ھەم يۇمشاق دېتال جەھەتتىن ئامېرىكىنىڭ قاتمۇ-قات بېسىمىغا دۇچ كەلگەن. بۇ سەۋەبلىك خىتاي دائىرىلىرى ئۆز-ئۆزىنى تەمىنلەشكە ئالاقىدار تەتقىقات سۈرئىتىنى تېزلىتىشكە مەجبۇر بولغان.
خۇاۋېي شىركىتى ئامېرىكىنىڭ ئاندروئىد سىستېمىسىغا بېقىنىپ قېلىشتىن قۇتۇلۇش ئۈچۈن، يېقىندا «خۇڭمېڭ» مەشغۇلات سىستېمىسىنى ياساپ چىققان بولۇپ، كېلەر يىلى خۇاۋېي مەھسۇلاتلىرىغا ئىشلىتىدىغانلىقىنى، 8-ئايدا بۇ سىستېمىنىڭ سىرتقا ئېچىۋېتىلىدىغانلىقىنى بىلدۈرگەن.
ئۇندىن باشقا خىتاي دۆلەت مۇداپىئە پەن-تېخنىكا ئۇنىۋېرسىتېتى كومپيۇتېر ئۈچۈن چىلىن (麒麟) مەشغۇلات سىستېمىسىنى تەتقىق قىلىپ، ياساپ چىققان بولۇپ، ۋىندوۋس سىستېىمىسىنىڭ ئورنىغا دەسسىتىشنى پىلانلىغان. ئەمما بۇ سىستېمىنى قوللايدىغان يۇمشاق دېتاللار ھازىرچە ناھايىتى ئاز ئىكەن.

بۇ خەۋەر 9455 قېتىم كۆرۈلدى
10/12/2019 22:19:00
ئىنكاسلار
ئىنكاس يېزىڭ
0 بۇ خەۋەرگە ئىنكاس يوق