ئۆمۈر مەنزىلى

 

ئۆمۈر مەنزىلى

(ئابدۇرېھىم ئۆتكۈر)

 

يەشكەندە ئادەملىك مەناسىنى مەن،

سۆڭۈكۈم تاش كەبى قېتىپ بوپتىكەن .

نە ساۋاب نە گۇناھ بىلگەن چېغىمدا،

گۇناھىم ھەقدارغا يېتىپ بوپتىكەن.

دوست بىلىپ سىرىمنى بەرسەم بىرىگە،

ئۇ مېنى ياتلارغا سېتىپ بوپتىكەن .

كۆزلىرىم كور ئىكەن كۆرگىنى قۇرسۇن،

غەپلەتتە باھارىم كېتىپ بوپتىكەن .

مەن نادان ، نادانمەن يىللار ئالدىدا،

نەچچە تاڭ مەن ئۈچۈن ئېتىپ بوپتىكەن .

ھوشۇمنى تاپقاندا يۈگۈردۈم ئەمما،

كۈن مېنى ساقلىماي پېتىپ بوپتىكەن.

گۈل نىمە؟ نە تىكەن قەدرىنى بىلمەي،

ياخشىلار مېنىڭدىن كېچىپ بوپتىكەن .

ئۇلارغا تەلمۈرۈپ قولۇم سۇنغاندا،

يەتمىدى بەك يىراق كېتىپ بوپتىكەن .

سىرلىرىم بارمىكىن دەپتىمەن ئەسلى،

سىرىمنى رەقىبلەر ئېچىپ بوپتىكەن .

مەس ئىكەن يۈرەگىم دەرت پۇشايماندىن،

قەدەھلەر تولدۇرۇپ ئىچىپ بوپتىكەن .

تىلەيمەن بىر تىلەك ھەمدۇ-ساناھدىن،

ئۇ ماڭا كۈچ قۇۋەت بەرسە بوپتىكەن .

شۇم بۇيا ،تىكەنزار بولسىمۇ ئىزىم،

سايلارغا بىر كۆچەت تىكسەم بوپتىكەن.

 

بۇ خەۋەر 1718 قېتىم كۆرۈلدى
25/10/2019 14:10:00
ئىنكاسلار
ئىنكاس يزىڭ
0 بۇ خەۋەرگە ئىنكاس يوق